Mary Ellen Richmond-ek gizarte-langintzaren oinarri zientifikoak ezarri zituen, bai lanbidearenak bai jakintza-arloarenak. Izan ere, gizartelangintzaren eremuan, jardun profesionalerako eta prestakuntza akademikorako lehen proposamen teoriko-metodologikoak egin zituen. Mary Richmonden obra aztertu duten egileak bat datoz beraren ekarpenak gaurkotasun handikoak direla baieztatzean. Ideiok XX. mendearen hasieran ezagutarazi bazituen ere, oraindik ere orientabide baliotsuak dira gaur egungo gizarte-langintzaren errealitateari aurre egiteko eta mahai gainean ditugun auziak ebazteko.